漁署封深灣護龜 遭網民秒殺

《蘋果日報》，2018/5/29

據《世界自然保育聯盟瀕危物種紅皮書》記載，𠵱家全球有7個海龜品種，當中只有綠海龜被列為「瀕危」級別，而南丫島深灣就係其中一個長期而穩定嘅繁殖地點，漁護署每年都好識做，提早宣傳每年繁殖期就會封灘畀海龜繁殖，之不過封咗個灘，係咪可以令到海龜安心繁殖呢？海上嘅遊艇又點先？

漁護署噚日喺facebook出po，話由6月1號到10月底，會將南丫島南面嘅深灣沙灘封閉，等綠海龜可以靜心產卵生小海龜，不過好多網民即時秒殺漁護署，話沙灘唔畀人入冇用，因為海龜根本唔能夠從海上嘅遊艇群中「登陸」沙灘生龜仔。有心水清網民話其實三五七年前已經冇綠海龜產卵，仲有唔少報道話過，海龜唔再喺深灣繁殖，因為夏天海上有數以十計嘅遊艇，加上香港海域污染越嚟越嚴重，令綠海龜走下一隻又一隻，最尾咪一隻都冇囉！