原文連結在此: https://www.hk01.com/寵物/240024/毛守救獲10隻小型玩賞犬-疑遭黑心繁殖場遺棄-為歷來最大規模
犬隻遭人遺棄的事件時有發生，毛孩守護者前日（24日）在新界元朗、天水圍拾獲大批被遺棄狗隻，大多屬尚未絕育的小型玩賞犬，身體狀況惡劣，義工猜測犬隻來自非法繁殖場。
【9月26日更新】毛孩守護者在元朗屏山救獲第11隻疑遭繁殖場棄養的狗狗。
元朗出現大批小型玩賞犬
《香港01》訪問本地動物組織毛孩守護者（下稱毛守）創辦人陸家捷（Kent），他指出現時已經救獲10隻棄狗，「我哋收到五、六個唔同嘅電話，每個都話見到馬路有啲狗走嚟走去。尋晚（24日）就喺坑尾村草叢度執到兩隻，其中一隻走咗入石屎廠，後尾捉番。跟住收到另一個求救係元朗公園對面油站附近， 有一隻被車撞傷，係果度又捉咗兩隻。而佢哋個樣都好接近。佢地全部小型玩具犬，未必係純種，有啲係芝娃娃，有啲好似係約瑟溝西施，個樣都係得意嘅。」Kent已經把遭車撞傷的狗狗送到獸醫診所，幸好只是皮外傷，筋骨無大礙。
「我地喺周圍再搵，搵到好夜都無再搵到。」Kent當晚不停接到求助電話，忙於幫助街上的狗狗，至清晨四點半才停止行動。至昨天（25日）又再收到新的求助電話，「今朝（25日）又收到求救。天水圍又有三隻，坑尾村又有兩隻，元朗公園又有一隻。不停收到電話，話喺街上見到小型長毛狗。我一睇到已經覺得好奇怪，因為呢啲小型玩具犬好少會係街上流浪，佢地根本生存唔到。好明顯係有人丟出嚟。」
每隻被遺棄的犬隻都長得非常可愛。（Facebook圖片：毛孩守護者）
混種芝娃娃在草叢中。（Facebook圖片：毛孩守護者）
健康情況惡劣
毛守拾獲的犬隻全部無植入晶片，年紀估計超過八歲，Kent認為狗狗九成來自非法繁殖場，「全部（狗）指甲好長，代表佢地長時間困籠；全部皮膚好差、甩毛，皮膚發炎，長毛嘅打晒結，好污糟；全部好肚餓，營養不良，超級瘦。所以一定唔會係合法狗場嘅狗，因為漁護署會吊銷佢牌照。」從牠們的身體狀況來看，過去明顯被人疏忽照顧。其中一隻健康情況最差的，眼睛已經受感染而萎縮。目前Kent已經帶牠們看醫生，並安排寄放在暫託家庭。
「有九隻囝，一隻囡，全部都未絕育。所有囝一入籠已經下意識會對狗囡做交配嘅動作，好明顯佢一向都過開咁樣嘅生活。」大多數繁殖場飼養的犬隻都以雌狗為主，不過這次Kent卻拾獲大批雄狗，他最初亦為此感到奇怪，「可能狗公無咩用途，所以丟晒出嚟，費事晒米飯，而狗乸就可能賣咗畀人。」
長毛狗狗披毛狀況惡劣。（Facebook圖片：毛孩守護者）
疑與139B修例有關
問及Kent對於非法繁殖場棄狗的看法，他認為跟2017年修訂的「139B」有關，他指出，「139B修例已經實施咗，呢啲情況都係預計以內。非法繁殖場都好難生存，因為所有賣狗嘅都要有牌，漁農署又會放蛇，除非係黑市私下買賣，如果唔係都會有影響，佢地生存空間少，唯有將啲狗丟出嚟。」新修訂的香港法例139B章《公眾衛生（動物及禽鳥）（售賣及繁育）規例》於2017年3月20日正式生效，繁殖及售賣狗隻，都要申請牌照，否則最高可被罰款10萬元。
「（以前）間唔中有，我地執過好多名種狗，鬆獅狗、曲架狗、史納莎，佢地都係來自繁殖場，不過今次係比較大批、大規模。其實我地未必執得晒啲狗，我估計被遺棄嘅唔止十隻。」Kent指出是次救獲的犬隻外貌相似，而且出現時間、地點接近，相信來自同一繁殖場，他感慨地說道：「佢地都好可憐嘅，一直都做交配嘅行為，可以想像到佢地之前嘅生活係點樣。部份性情都唔係咁溫馴，好似畀人打過咁。」Kent亦希望透過報導，讓大家明白繁殖場的無良之處，「其實佢地咁細隻，流浪真係生存唔到，而且佢地唔係放喺個籠度，佢地會衝出馬路。」
前後共接獲10隻。（Facebook圖片：毛孩守護者）
難以送交執法部門
根據香港法例第421章《狂犬病條例》，遺棄動物是嚴重罪行，最高可被罰款10,000元或監禁六個月。可惜根據Kent過往的經驗，警方要成功執法絕非易事，「 因為佢哋無晶片，好難追查到啲咩，最後只會不了了之。漁護署都只會當佢地係流浪狗，交佢地出去可能都係死路一條，大多數流浪動物嘅路都係咁。」
「我希望執法部門可以認真處理，包括漁護署、警方，其實棄狗係違法嘅，不過成功檢控的數字好低，呢樣野係直接影響到動物嘅福利。佢地全部超過五個月，無打針、無狗牌，香港受狂犬病條例保護，所以佢地對公眾衛生有存在風險。」Kent認為執法人員加強打擊的力度，才能避免動物受到傷害，他慨嘆指出，「拯救只係無辦法之中嘅辦法。如果（執法人員）唔做任何野，每個人都會咁樣棄狗。就好似因為打劫要坐監，所以大家會驚，如果打完劫都唔洗坐監，相信好多人都會打劫。」他認為進行檢控的情況不多，令法律失去了阻嚇力。
毛守日前在元朗等地搜索至凌晨。（Facebook圖片：毛孩守護者）
盼得好心人收養
毛守至今仍收到求助電話，不過單憑市民描述，未能肯定牠們來自同一批狗。雖然狗狗們身世可憐，但仍有不少熱心市民鼎力相助，全部狗狗亦都找到暫託家庭照顧。Kent表示，「我哋要隔離十四日，先可以放佢哋入狗場，因為新狗如果有傳染病，可能會傳染到畀其他狗，所以我哋都唔敢放佢哋入場。宜家唯有送去暫託家庭，而佢哋首要嘅條件係，照顧到佢哋（狗狗）之餘，自己屋企亦都無狗。」
「佢地健康情況穩定就會打預防針，全部都會落返晶片。」待牠們的健康、性情都穩定下來，Kent便會為牠們開放領養，「因為佢哋身型細，而且得意嘅，應該成功出領養嘅機會好大。只係要幫佢哋沖涼，執返靚仔就得。」雖然有部份狗狗面對人類都顯得比較惡，不過Kent有信心只要相處一段時間，牠們便會重新接受人類。
《毛孩子：我們的故事》再次希望狗狗脫離繁殖場魔爪後，能夠找到一位愛鍚牠們的主人，幸福快樂地渡過餘生。
文章
