西九站執勤靈犬 靠索分出港幣美金

《蘋果日報》，2018/9/24

廣深港高鐵香港段噚日正式通車，唔少市民搶飲頭啖湯買咗飛試搭，但一班政界中人前日已經喺西九站通連儀式後親身感受「動感號」令佢哋幾感動，相信身兼行會成員嘅新民黨立法會議員葉劉淑儀都感觸良多，佢喺facebook分享坐後感，但估唔到其中一位「執勤員」會引起葉劉高度關注！

葉劉︰信不信由你

葉劉話喎，出入香港口岸時，見到海關職員拖住一隻拉布拉多犬，好奇下一問，海關關長就話呢隻偵緝犬叫Connie ，受過特別訓練，如果有乘客帶咗過多嘅鈔票過境，佢都可以立即分辨，甚至連港幣或美鈔都識得分辨。係咪有啲難以置信？似乎葉劉都覺得係，佢總結話：「真的信不信由你了」。

除咗講狗狗，葉亦分享動感號嘅坐後感，大讚「一地兩檢」口岸過關安排好便捷，又讚嘆極速由香港直達廣州！葉劉將佢主持法案委員會嘅「第一次」獻咗畀高鐵，一地兩檢法案審議期間佢仲同民主派開戰，最終都及時通過法案，難怪作為葉劉「妹妹」嘅林鄭噚日致辭時，都點名感謝佢同立法會主席梁君彥啦。