狗主不滿司機違泊 便便抹車「行私刑」

《蘋果日報》，2018/9/17

究竟有乜嘢原因會令人判官上身，替天行道懲罰違泊司機？係貪玩定係憤怒得滯？大角嘴一名車主發現座駕近日被人連續抹狗屎喺車上，佢上周四晚守株待兔擒獲真兇，發現原來係一名狗主故意向路邊停泊車輛抹屎，最終搞到警方到場處理件事。

俾車主埋伏斷正

居住大角嘴嘅車主李先生稱，一年前開始將車通宵泊喺樂群街公園對開路邊，至第二日朝早攞車開走，一直相安無事，大約兩星期前開始，佢發現架車擋風玻璃上無端端出現一篤狗屎，真係隔住mon都聞到陣味。李先生起初認為並非有人故意留低，未有深究，直至上周二開始，連續三日俾人用狗屎抹窗，令佢起咗疑心，懷疑有人故意玩嘢，估計真兇喺晚上9至12時犯案，專門向泊喺樂群街頭私家車落手。李上周四故意將座駕泊喺上一次遇襲同一位置，然後坐喺公園暗角埋伏，直至晚上10時幾，終於見到一名身材健碩嘅白衫男拖住一隻棕白色狗喺公園狗廁所大便，然後用報紙兜住嚿狗屎，再將狗屎抹喺佢車窗，李立即現身。

李向對方質問時，形容有人仍死不悔改，仲反咬話啲私家車車主通宵違泊，更揚言冇證據入佢，甚至聲稱自己係健身教練，挑釁李打番場交和解，李先生當時覺得對方精神有異，無謂講咁多，直接打999報警。結果警員到場後，白衫男終於死晒狗認低威，願意賠300蚊清潔費了事。

李極度不滿白衫男行徑，「違泊都唔係由得佢去處理，你可以報警，但唔可以咁做，咁樣係刑毀」，但為免入差館錄口供先同意和解，但佢話日後會泊喺第二度，費事愛車再遭殃喎。
警方證實上周四晚上10時許，一名47歲姓李男車主報案稱俾人抹狗屎喺車身，警員到場調查涉案嘅37歲姓魏男子，相信冇刑事成份，當做糾紛處理。