風災未平蜂災又起 大埔14人中針

《蘋果日報》，2018/9/18

「山竹」噚晚雖然已經遠離香港，但佢破壞力驚人，留低唔少手尾，其中大埔就出現另一場「蜂災」！多個大埔居民喺facebook群組發帖，話噚日廣福道出現好多蜜蜂，區內有多個人俾蜜蜂針傷，呼籲市民小心。

樹塌巢毀　亂飛出針

有網民即時聯想懷疑係山竹遺禍，吹冧大量樹木，令到喺樹上或樹幹入面嘅蜂巢損毀，蜜蜂流離失所。大埔那打素醫院發言人證實由噚日凌晨零時至噚日下晝4點嘅16個鐘之內，有14個人俾蜜蜂針親去急症室求診，不過院方冇透露傷者「遇襲」嘅確實地點。

噚日下晝大埔fb群組成員發帖，話有同事返工途中俾蜜蜂針傷，事主去那打素醫院求診，有護士同佢講，佢已經係同日第10個俾蜜蜂針親嘅病人，唔知點解大埔廣福道有好多蜜蜂，唔排除係蜜蜂冇咗蜂巢，四圍亂飛針人。其後陸續有網民發帖轉述類似內容，又提到大埔墟冧樹情況嚴重，叫巿民提高警覺，小心蜂群。

事件引起網民關注，好多人留言都話噚日喺大埔的確見到好多蜜蜂，有人話噚日朝喺運頭塘等的士俾蜜蜂圍住，有人就話企喺廣福巴士站等74X都差啲俾蜜蜂針到，甚至有人喺大埔王肇枝中學出面同蜜蜂擦臂而過，但就幸運冇俾蜜蜂針到。汀角路村屋有住客同《蘋果》講，喺屋企望出窗都見到蜜蜂亂飛。

《蘋果》就呢件事向醫管局查詢，係唔係真係一日之內大埔區有咁多巿民俾蜜蜂針親求診，雅麗氏何妙齡那打素醫院發言人回覆，噚日凌晨零時至下晝4點，共有14個人因被蜂螫傷去到該院急症室求診，全部病人接受治療後已經出院。