狗酒店賣過期狗糧

《壹週刊》，2013/2/21

本刊曾兩次報導寵物酒店The Grand Dogaroo Pet Hotel懷疑因疏忽照顧而先後導致兩隻小狗受傷及死亡，事隔年多，該店又再出事。本刊收到讀者投訴，指該店售賣過期狗糧，更在包裝上另行貼上最佳食用限期貼紙，試圖瞞混過關。

翁先生去年六月開始幫襯The Grand Dogaroo Pet Hotel，「帶隻狗去training，之後就叫我買埋佢哋代理嗰隻Darford狗糧，仲叫埋朋友幫襯。」 至今年一月尾，翁先生再向該店訂購狗糧，但卻發現狗糧上的最佳食用限期被貼紙蓋着，「上面寫住2013年4月30日，我搣開佢，發現下面係寫住2013年1月31日，再搣多層，先發現原來包糧本來係印住2012年10月31日，原來已經過咗期三個月！」翁先生和朋友遂檢查其他同時訂購回來的狗糧，發現全部的最佳食用限期均被改動，貼紙寫着4月到期，但撕開貼紙，到期日卻是1月，「我打電話去投訴，佢竟然話冇問題，仲來信解釋話係美國嗰邊印刷出錯，嘈咗好耐先肯退錢，但我朋友嗰千幾蚊狗糧就仲未退。」

跟進過期狗糧仍有售

記者上週四到該狗酒店位於窩打老道的分店，仍發現有該款狗糧發售，記者購買其中一包，包裝上的貼紙寫着最佳食用限期為2013年4月17日，但撕開貼紙，卻是2013年1月17日，即已過期一個月。記者即場向職員查詢並要求退款，但職員拒絕：「佢（批貨）一返嚟已經係咁，所以係OK嘅！」

專家話法例無監管

獸醫黎昌生指：「狗糧放得太耐會營養流失，食咗都吸收唔到；而且好易吽出蟲同發霉，狗仔食咗，小則肚屙，大則會食物中毒而死。」他又指，由於政府並無監管狗糧，如狗隻出事，狗主難以追究。他建議狗主，如對狗糧質素有懷疑，應即時棄用，「其實好少話印刷出錯，就算出錯，為咗商譽，都會成批貨唔要，人類食物你都會咁做。」

回應來貨已有貼紙

The Grand Dogaroo Pet Hotel發言人回覆指，代理供貨時包裝已貼上新食用日期的貼紙，又指已獲香港代理確認狗糧並無問題，但基於安全理由，所有涉事狗糧已於上週五落架。本刊向美國Darford總公司及Darford的香港代理Grand Alliance（Asia）Limited查詢，但至截稿前無人回覆。

壹判官
The Grand Dogaroo Pet Hotel劣跡斑斑，今次仲售賣過期狗糧，各讀者幫襯前要認清寶號！評分：劣劣劣劣（五個劣為最嚴重）