禁熊膽製品Miss Mo咬住唔放

《明報》，2013/2/8

上屆立法會衛生事務委員會曾通過無約束力議案，要求政府禁止含熊膽成分產品出售及進口，但之後無咗下文。公民黨毛孟靜（Miss Mo）就話要咬住唔放，已經去信今屆委員會主席梁家騮，要求喺會上討論事件，又計劃提口頭質詢，要求政府提供資料，睇睇吓o依家香港進口及消費咗幾多熊膽製品。

衰過殺鯊取翅政府唔拖得

Miss Mo 話，取熊膽汁，仲殘忍同埋衰過殺鯊魚取魚翅，極度唔人道，「要隻熊一生一世困喺籠內（插針取膽汁），慘絕人寰」。Miss Mo 話，o依家市面一啲補身藥物及化妝品都含有熊膽粉成分，佢知道要一刀切禁進口或出售會頗複雜，但政府唔可以拖字訣，可以做幾多就盡做。

亞洲動物基金話，目前喺亞洲各地被抽取膽汁嘅黑熊超過1.4 萬隻，僅中國嘅活熊取膽業就有上萬黑熊。亞洲動物基金研究表明，活熊取膽可能給黑熊帶來肝癌、腹膜炎、關節炎、膽結石、膽囊炎等多種疾病。世界自然保護大會（World ConservationCongress）已通過有關活熊取膽業決議，要求各國唔好增加養熊場內黑熊數量，仲要求各國開展熊膽替代品研究。