老三陽忠犬「坐監」 友善Lucky咬人有原委

《頭條日報》，2013/5/9

Kelly同好多姊妹都鍾意江滬菜，有時落廚煮幾味都鍾意去銅鑼灣名店「老三陽」買食材，前幾日聽到老三陽登龍街分店養嘅唐狗Lucky咬傷人，?家在漁護署「坐監」一星期，聽老闆祈廣楠講，Lucky好忠心，對一班熟客好友善，只係有時對衣着唔太企理，如拖鞋短褲、又有酒味嘅人「兇」吓吠吓，只係護主心切咋！

祈老闆話，原本舖頭養咗隻唐狗女Happy，已十三歲，係對面五金舖老闆送贈，後來見Happy年紀大，就去愛護動物協會領養多一隻唐狗Lucky。

佢話，之前登龍街附近有白粉友、夜晚又有小偷，所以養狗看門口。佢話，其實兩隻狗都好忠心，唔會隨便咬人，只係有時俾人搞、又或者見到鬼鬼祟祟、又唔太企理嘅客人，就會吠兩聲嚇吓人。

太子女仲話，其實兩隻狗每次咬人，背後都有原因，有次就因為有醉酒山東客，有次就因為女孩把公仔放在狗背上。祈老闆話，兩隻狗又搞到客人，所以可能日頭都唔放佢哋出舖啦，夜晚先畀佢哋自由奔放啦！