鸚鵡Gag Gag走失 主人落淚 「我早已當佢係屋企人」

《晴報》，2013/10/11

　　迷你金剛鸚鵡「Gag Gag」上月因受驚飛走，主人葉生連日到街上呼喚及貼街招，希望尋回愛鳥。談起Gag Gag，更激動落淚道：「我早已當佢係屋企人，只係外形係雀仔。」

　　Gag Gag五年前由葉先生兒子買來飼養，年前葉先生因經歷一件令他很不開心的事提早退休。Gag Gag則似乎懂性般，常飛到他的手「嗲他」、「撩他玩」，並像和他「傾偈」般發出各種聲音。

　　葉稱，雖不明Gag Gag所言，但因牠像小朋友般聰明、活潑，與之相處令他心情也變得開朗，人與鳥的感情，自此變得親密深厚。

與天敵貓咪成好友

　　說到Gag Gag的生活點滴，葉先生便不期然流露笑意，如數家珍，「Gag Gag平日十分乖巧及黐人，識講『你好』、聽到音樂亦會跟着旋律哼。仲好有靈性，響屋企見唔到佢，只要嗌Gag Gag就會飛落我隻手。」

　　Gag Gag活潑得意，就連天敵的貓咪也變成其朋友，葉先生稱，「平時得Gag Gag蝦隻貓，佢啄隻貓條尾同塊面，隻貓只會向後退，從不還擊。」甚至，當Gag Gag被葉先生「剪趾甲」而掙扎慘叫時，這隻以德報怨的貓貓，即不惜咬和抓主人，挺身救友。所以自Gag Gag走失後，貓貓也變得異常失落，常呆望鳥籠及Gag Gag飛走的窗等牠歸來。

　　上月28日，Gag Gag疑被樓上裝修的電鑽聲「嚇親」，飛離旺角廣華街住所，「叫都叫唔住」。現時葉生日夜也到附近街道尋找，希望可尋回愛鳥。

雀鳥店：迷你金剛鸚鵡易受驚

　　雀鳥店負責人指，迷你金剛鸚鵡十分「跟人」，牠們容易受驚，故要防牠飛走，最好在放出來前，把門窗關好，或每三個月剪去牠的飛羽，以防其高飛。而迷你金剛鸚鵡主要吃鸚鵡糧及瓜子，少吃其他東西，亦不懂自己覓食，故料該鸚鵡走失後，可能飛到其他民居。