街市禁狗令 領匯「得把口」

《東方日報》，2013/11/23

「始終呢度係街市，陣間啲狗喺度大小便就唔係幾好，我仲見過啲人抱住隻長毛狗仔，哄晒埋去啲小食檔度買嘢食，啲毛飛晒落食物度，好唔衞生！」家住沙田沙角邨的陳小姐指出，經常有街坊帶同寵物進入街市，擔心影響街市環境衞生，要求領匯關注。

「明顯唔係導盲犬都唔理」

領匯發言人表示，除視障人士可帶同導盲犬進出街市外，其他訪客均不得攜帶犬隻進入，如有需要職員會即時勸喻及要求相關人士帶同犬隻離開，沙角街市辦事處亦已提醒職員嚴格執行此規定。

陳小姐對視障人士帶導盲犬進出街市表示歡迎，但要求領匯對其他違規狗主作適當行動，切勿「得個講字」，「如果係導盲犬就梗係冇問題啦，但我次次見到嗰啲都好明顯唔係導盲犬，領匯都唔理！」