將軍澳走失雞尾鸚鵡 主人每天到車站前舉牌 盼獲市民留意

2018-10-31 14:45
原文連結在此: https://www.hk01.com/寵物/253382/將軍澳走失雞尾鸚鵡-主人每天到車站前舉牌-盼獲市民留意

本月19日晚上7點半，將軍澳清水灣半島有主人走失一隻雞尾鸚鵡（又稱玄鳳鸚鵡）「金金」，主人每天外出尋找愛雀，可惜遍尋不果，為了讓更多市民幫忙尋找，主人更不惜每天在車站舉牌。

金金是一隻黃化雞尾鸚鵡。（相片由受訪者提供）

將軍澳清水灣半島走失

雞尾鸚鵡「金金」主人Hailey接受《香港01》訪問，談及金金走失經過時指出：「我哋喺窗裝咗窗網，長期都有打開窗，不過果日佢喺個窗網攝咗出去。」由於當時是晚上7時半，窗外漆黑一片，Hailey難以看清楚金金的飛走的方向，她與家人隨即出門尋找金金的下落，在清水灣半島住所附近尋覓，可惜遍獲不果，「喺頭三、四日黃金時期，我每日都會喺唔同地方搵，例如屋企樓下平台、山頭。」

Hailey和家人認為上腳環並不人道，所以金金腳上並沒有腳環。（相片由受訪者提供）

每天車站舉牌盼獲市民留意

「我哋已經通知所有屋苑管理員，如果有消息可以通知我哋，亦都係會所張貼咗告示。」Hailey於Facebook各大雀鳥群組張貼尋雀啟示，希望區內市民可以留意到金金走失的訊息，她與家人亦每天輪流外出尋覓，「我哋前幾日有貼過街招，但係已經俾人搣咗。」

終於有一位小巴司機向Hailey表示曾經遇見金金，她轉述司機說話的內容指：「佢每日都會喺小巴站附近餵雀，最近有見過疑似係金金嘅雀。」

Hailey：「呢張佢笑得好開心......」（相片由受訪者提供）

鍥而不捨地尋覓

金金自本月19日走失，至今已失蹤十多天，但Hailey仍然每天帶著告示牌到車站，希望市民能夠幫忙留意金金的下落。她曾多次致電SPCA、漁護署，亦未有金金的消息。但Hailey決不放棄，她哽咽地說，「我哋係佢嘅全部，佢都係我哋嘅全部，無論搵唔搵到佢都好，佢都係我屋企人，我地嘅關係唔可以分割。希望大家繼續俾機會我哋搵佢。」Hailey指出，飼養寵物是對牠一輩子的承諾：「我好希望可以遵守對佢嘅承諾。」

主人Hailey與家人一直不放棄，每天到車站舉牌。（相片由受訪者提供）

走失鸚鵡檔案

名字：金金
性別：男
年紀：一歲半
品種：雞尾鸚鵡（又稱玄鳳鸚鵡）
走失日期：10月19日 下午約7時半
走失地點：將軍澳清水灣半島
特徵：右翼有少許啡色漬，其中一隻後腳指指甲明顯較短。

大家假如在街上發現金金，請聯絡梁小姐（電話：5160 1273）。

由於金金比較膽小，市民亦要保持冷靜，Hailey指出，「如果唔驚雀，可以嘗試遞出手指，佢見到有手指喺腳仔附近，都會主動行上去。」金金喜歡被人撫摸頭部、臉頰，但避免觸摸牠的身體，市民嘗試以上方法安撫牠的情緒。