石塘嘴山道 野豬出沒注意

《蘋果日報》，2018/11/29

西區一向係野豬盤踞地之一，啲野豬已經好似街坊咁，得閒喺西半山晨運，得閒又落山視察民情，久不久就有巿民同佢哋偶遇。巿民周先生上星期六（24日）下晝5點幾行經石塘嘴山道，沿斜路落斜向石塘嘴巿政大廈方向行嘅時候，就見到一隻野豬喺馬路一帶徘徊，佢形容隻野豬好似唔驚人咁，周圍走嚟走去。

由於當時馬路冇車行，野豬沿住條斜路Z字形咁緩步跑咗幾分鐘，之後走返上行人路沿一條後樓梯跑落去，消失咗蹤影。周先生估計隻野豬係喺山上面走落嚟搵嘢食，但佢都係第一次喺山道見到野豬，以往通常喺香港仔比較常見。

周先生知道試過有野豬發惡咬人，所以佢見到野豬嗰陣一直同佢保持安全距離。佢又話，平時有居民放工之後會喺山道花園放狗，好彩佢見到野豬嗰時仲未入黑，冇乜人放狗，否則野豬遇上狗，萬一打起上嚟真係唔知點收科喎。