地區鼠患嚴重 田二少提議絕育

《東方日報》，2018/11/16

立法會議員田北辰（田二少）舊年唔跟從建制陣營「隊形」，反對迪士尼樂園擴建撥款引嚟爭議，而繼狙擊「米奇」後，佢最近又再出手，但今次目標係活生生嘅過街老鼠，仲搵埋食環署人員一齊落區狙擊老鼠添！

話會逼港府搵專家研藥

田二少上次狙擊「米奇」失敗，唔知係咪仍然滿腔怒火，近日將目光放喺地區滅鼠，話八月份荃灣區鼠患指數係全港最嚴重，又話荃灣市中心有一百七十個老鼠籠，但係加埋每日平均只捉到唔夠三隻活鼠同一隻死鼠，而一對老鼠每年可繁殖一千六百隻老鼠，傳統鼠藥又要三至七日先殺得死老鼠，殺極都唔夠佢哋生得快，所以絕育係更有效。

尋日佢喺Facebook就提到各種各樣嘅滅鼠方法，例如美國用乾冰、新西蘭設計嘅自動化滅鼠器等，但最狠嘅都係絕育鼠藥，仲話會逼政府盡快搵專家研究絕育鼠藥，由源頭減少老鼠繁殖添。今仗對手只有老鼠，相信田二少唔會重蹈「米奇」失敗一役嘞！