美松苑 馬騮團 排隊入屋偷食

《蘋果日報》，2018/11/29

再有大圍美松苑居民同小記訴苦，話有馬騮入屋偷食。約6年前開始傳出有馬騮兵團入侵美松苑民居，似乎情況到𠵱家都冇乜改善。住喺盛松閣嘅高小姐前日下晝兩點幾，突然喺屋企聽到街外傳嚟尖叫聲，望出窗見對面樓康松閣有十幾隻馬騮沿住外牆水管爬上爬落，逐家逐戶試探入唔入到屋。

沿水管向上爬搵冇閂窗民居

據高小姐影到嘅片段，聽到有管理員大嗌：「馬騮呀，閂窗呀，好多馬騮呀！」片段中見到一隻馬騮由地下行人路簷篷沿住水管向上爬，爬咗兩層就好熟練咁跳過去單位客廳嗰邊窗，喺窗口裝吓裝吓，跟住又繼續爬上一層，喺花槽壆邊坐低歇一歇，然後向上爬，終於爬到第四層一個晾晒衫嘅單位，就鼠咗入去。

高小姐話嗰個單位係趟窗嚟，住戶冇閂實窗，馬騮好輕易推開窗就入到屋。佢見到馬騮喺屋入面攞咗薯片、公仔麵同麵包走出嚟，好心急爬返落簷篷度開餐。一隻馬騮入到屋其他就跟住入。

玩咗大半個鐘，高小姐話馬騮今次最高紀錄爬到7樓。高小姐喺美松苑住咗十幾廿年，初初搬去時冇馬騮，係近年先咁猖狂，譬如街坊去完超巿買嘢拎住一袋二袋，會有馬騮搶嘢食，啲馬騮仲專恰公公婆婆。高小姐話居民都覺得好困擾，雖然漁護署喺屋苑入面有擺啲籠捉馬騮，但擺咗咁多年好似都冇見過成功捉到馬騮。