麗麗康復了 要搵爹哋媽咪

《都市日報》，2013/10/3

被狂徒斬斷咗隻腳、喺死神關口幸運咁逃脫嘅「三腳貓」麗麗，成功做咗截肢手術後，康復進度都唔錯，之前仲好叻女咁「世紀一企」！

拯救麗麗嘅非牟利獸醫協會執行主席阿Mark(麥志豪)，噚日喺facebook上載咗麗麗最新嘅「艷照」，見到麗麗已經拆咗線兼除埋頭罩，又配上「你知道我在等你嗎？」嘅字句。阿Mark仲宣布一個大喜訊，就係麗麗終於康復喇！阿Mark話麗麗仲係有啲怕人，唔太鍾意出嚟走走散吓步，鍾意留喺籠入面，佢仲開始為麗麗搵爹哋媽咪！

唔少人都話好想領養麗麗，阿Mark為免大家只係一時衝動，同埋為咗表示真係有誠意，佢希望有興趣領養嘅人提供聯絡電話、住所類型、現時飼養動物嘅種類同數量、飼養貓隻嘅經驗，同埋領養麗麗後，願唔願意接受家訪同提供麗麗嘅最新消息。咁多資料，領養麗麗真係一啲都唔易o架，連阿Mark都話自己「奄尖」，認為貓新手同公屋住戶唔係太適合照顧麗麗。雖然「奄尖」啲，但為咗麗麗着想都應該嘅。想做麗麗嘅爹哋媽咪就將資料電郵去markmak@npv.org.hk啦！