黑狗半夜三更紅隧過海

《蘋果日報》，2018/10/29

雖然紅隧塞車係常態，但半夜三更又唔係有意外發生都咁塞車就有啲怪嘞，噚日凌晨1點幾，陳先生同Francis分別喺九龍搭車過海，喺紅隧管道見到隻狗跑嚟跑去，相信係導致塞車嘅「元凶」。

喺旺角搭的士過海嘅陳先生，初時喺紅隧入口見到隻黑狗喺巴士站馬路邊跑嚟跑去，佢哋經過收費亭時通知職員，但說時遲那時快，隻狗已經跑咗入管道，快線啲車都收慢避佢。
管道內來回練跑

Francis喺美孚搭通宵巴N368過海去銅鑼灣，去到紅隧口塞咗大約15分鐘，其間聽到一下一下短促嘅響按。佢坐喺巴士上層最前排，冇幾耐就見到有隻黑色物體喺兩條行車線中間逆流走過嚟，當物體靠近巴士先見到原來係一隻狗。即係話隻狗喺向香港嘅管道來回咁跑。Francis見到狗狗頸上面有類似金屬牌仔，加上乾乾淨淨，估計佢有人養，可能走失咗。小記噚日打去紅隧問當值職員，佢就話唔清楚事件，亦唔知狗狗最後點呢？