2018年10月19日星期五

20警蘭桂坊平亂 警犬激動 醉娃失控

《蘋果日報》,2018/10/17

中環蘭桂坊係夜蒲勝地,梁小姐星期日凌晨差唔多4點同朋友喺嗰度飲完嘢散band,佢哋行經德己立街一間酒吧對開,見到場面墟冚,一大班警察圍住一個懷疑飲醉酒搞事嘅男人,現場有警犬不停咁吠,有警察拎盾牌、揮警棍,氣氛緊張。

根據梁小姐嘅短片見到,當時一大班差人圍住個醉酒佬,個醉酒佬好似耍醉拳咁,企都企唔穩,仲撞跌咗酒吧出面畀人排隊嗰啲活動欄杆。

梁小姐見到一個懷疑識得醉酒佬嘅女仔,似乎都係飲多咗,想衝埋去醉酒佬堆人嗰度,另一個男性友人從後箍住佢都制止唔到佢,個女仔掙扎揈手揈腳,懷疑打到其中一個烏低身嘅警察個頭,個警察即刻起身攞支警棍出嚟作狀打個女仔嚇吓佢,其他警察見到湧上去叫個女仔走開,佢個男性友人即刻拉佢走埋一邊。

警持棍盾戒備

然後現場另一邊聽到狗吠聲,一隻警犬不停咁吠,領犬員已經拉住佢,但隻警犬好似想撲去咬人咁,領犬員大聲喝停佢,然後撳隻警犬個頭落地下大約5秒,等佢冷靜後再放開佢,繼續周圍巡維持秩序。在場有女仔見到話:「好慘呀狗狗!」

梁小姐估計現場總共有大約20個警察,有警察拎住盾牌戒備,現場地下有血迹及染血紙巾,在場警察不停趕走聚集嘅人群:「唔關事嘅走開、讓開讓開、keep moving、全部行開!」然後梁小姐又見到頭先情緒激動嘅女仔喺條斜路跌跌撞撞,要朋友拉佢起身,之後轉個頭唔知佢發生乜事,坐咗喺路邊又叫又喊,左腳小腿流晒血。

由於警察叫人離開,梁小姐都冇再留低,所以究竟初頭發生乜事,同埋結果警察有冇拉人,佢都唔清楚。