野豬毀農產 何俊賢促政府諗計解決

《東方日報》，2018/10/10

近年野豬喺市區出沒，可能有啲市民覺得好可愛，其實野豬會周圍摷嘢食，甚至咬人，會帶嚟一定滋擾。立法會漁農界議員何俊賢（高佬賢）尋日喺Facebook貼咗一啲受野豬摧殘嘅農作物，之後接受查詢時話市民唔好淨係睇外表，要對野豬有全面認識，例如佢哋走出嚟摷垃圾，係因為野豬食量好大，郊野範圍已經唔夠佢哋食，所以農業界成為頭號受害者，每當收成期將近，野豬就會成群結隊出沒，粉葛、蘿蔔、番薯統統都冇得剩！

高佬賢仲話近年關於野豬嘅投訴多咗，事關野豬一年可生兩胎，一胎有六至十二隻，加上佢哋喺野外冇天敵，「根本冇動物夠佢打」，所以就算佢哋存活率得一半，其增長速度依然驚人，如早幾年有指香港野豬數目約四千至六千隻，按呢個速度，依家可能有逾萬隻，不禁慨嘆「野豬不滿萬，滿萬無敵於天下！」

斥絕育方法落伍

唔少農民都整過網、鐵欄去阻止野豬，但野豬攻擊力強，根本擋唔住，如果改建磚牆又影響耕種，所以困擾咗農業界多年，加上近月內地非洲豬瘟肆虐，佢擔心如果野豬都會係傳播媒介之一，數量咁多將對業界帶嚟好大影響。佢又批評政府仲係用絕育嘅方法太落伍，要諗個比絕育更有效嘅方法先得。