巨蜥鬧市曬太陽 警召蛇王生擒

《蘋果日報》，2018/10/1

曬太陽啫，犯法呀？噚日下晝近3點，有眼利巿民見到深水埗港鐵站C1出口綠色上蓋出現一隻有保護色嘅蜥蜴曬緊太陽，一個舉機就個個舉機，吸引途人圍觀，懷疑有人擔心蜥蜴會跳入人群引起混亂報警。阿sir封鎖現場，反應敏捷嘅蜥蜴仔捐咗去附近一個生果檔，蛇王奉召生擒。

闖生果檔 途人：幾得意

讀者羅先生噚日經過趁熱鬧，佢話蜥蜴仔連埋條尾有手臂咁長，估計約兩呎長，外形得意但又有啲恐怖，疑似係寵物，唔知點解走咗出街，蜥蜴仔可能唔慣俾咁多對眼望住，有啲不安兩頭騰，爬行速度好快。羅先生話有10幾個差人到場，仲叫埋蛇王嚟，佢都緊張蜥蜴仔命途，問阿sir捉到之後會點處置，又叫阿sir唔好殺佢，希望蜥蜴仔可以同主人團聚。

其間蜥蜴仔跳到港鐵站出口旁邊生果檔牆角避風頭，一位年輕蛇王拎住大布袋，踎喺放生果嘅木板上助跳，諗住跳起一手捉住蜥蜴，點知俾佢走甩出咗街，蛇王一支箭追去後巷，幾位阿sir亦跟住跑。最終蛇王不負所託用布袋笠住蜥蜴。呢場蜥蜴出走記歷時45分鐘，警方話蜥蜴仔會交畀私人動物中心照顧。

香港兩棲及爬蟲協會會長楊嘉文話隻蜥蜴係綠鬣蜥，又叫美洲鬣蜥，成年身長可達兩米，主要分佈喺中南美洲森林。綠鬣蜥係《瀕危野生動植物種國際貿易公約》附錄II物種。