貓主子出巡搭巴士 奴才驚驚Call警察

《蘋果日報》，2018/10/10

奴才每朝逼地鐵逼巴士返工有苦自己知，一隻啡白色喵星人噚日朝7點幾「微服出巡」搭巴士視察民情，嗰架905號線九巴由灣仔北總站去荔枝角，點知去到西環嘅時候俾乘客發現咗，一班奴才見到主子現身大驚小怪，仲驚動差人出動盾牌「救駕」。

乘客張小姐喺西環水街上車，佢話嗰陣係繁忙時間逼滿乘客，佢上上層搵位，突然聽到有人大叫：「嗰度有貓呀。」她擰轉頭見到一隻啡白色花貓，花貓懷疑俾人嚇親跑嚟跑去，有啲乘客又驚，引起一陣騷動。巴士去緊下一站山道嗰陣，有個外籍男乘客請纓走去想捉住隻貓，點知俾花貓抓傷隻手流血。

警員出盾牌趕落車

花貓之後跳上車尾玻璃窗瑟縮一角，同時有乘客已通知車長報警，巴士喺德輔道西410號對開停車。差人到場拎住盾牌走上上層，張小姐話都幾誇張，結果差人用盾牌趕咗隻貓落車。事件擾攘咗大約10分鐘，花貓消失咗喺人群之中，受傷嘅22歲外籍男乘客送院醫治，而巴士之後恢復行車。

街坊捕獲交貓義工

但件事未完嘅，有西環人喺fb群組轉載呢單新聞，一班街坊知道件事之後，驚花貓唔知有冇受傷，或者蕩失路，加上嗰頭車來車往好危險，於是發動全天候追蹤。朝早11點，有巿民喺皇后大道西一間銀行出面見到隻花貓，有人放咗一盆糧水喺地下，有人通知愛協，愛協人員帶埋網同籠去捉貓，點知畀佢走甩，向山道方向跑走。街坊更加緊張四圍搵貓，有熱心街坊喺街頭又見返佢，諗住買罐頭畀佢食，但又嚇走佢。最終集合4個街坊之力，終於將隻花貓乖乖帶入籠，交畀區內貓義工照顧。