野豬山賊家族 搶食千元BBQ

《蘋果日報》，2018/10/1

去郊野燒嘢食，點知俾野豬搶晒做自助餐！巿民曾小姐上周五夜晚8點幾，約咗朋友去紅梅谷燒烤場，見識到野豬搶食嘅恐怖場面。話說佢哋帶住一袋袋食物上山，有一隻先頭野豬部隊尾隨佢朋友，大家以為嗰隻野豬係獨行俠，諗住頂多畀啲嘢食打發佢走，點知各人陸續洗好杯碟餐具同擺出食物後，野豬就call晒10幾隻親戚到場，有啲推倒凳上食物落地，有啲直接爬上枱開餐，無視眾人存在。

現場有兩個男士，但部份野豬體形龐大，驚驅趕佢哋會被反擊，結果大家無耐放棄千幾蚊嘅燒烤餐，行返落山到大圍醫肚算數。曾小姐話以前去燒烤都未見過野豬好似賊咁搶嘢食，懷疑有巿民餵慣餵熟，搞到野豬有恃無恐，佢哋當時打過電話畀漁護署求助，但因為冇人聽而作罷，曾小姐話以後燒烤咪搞佢喎。