鼠患嚴重賴天災 這個局長太不該

《東方日報》，2018/10/1

幾時都話從政嘅人面皮特別厚，好似美國總統特朗普咁吖，喺聯合國自吹自擂，結果畀人笑到面黃。港府高官亦唔執輸，除咗自誇防風暢有成效，仲厚顏到將滅鼠不力賴落超強颱風嗰度。咁都得，真係唔到你唔服。

自從港大公布全球首宗老鼠傳染人類嘅戊型肝炎個案後，全城人人自危，滅鼠懶懶閒嘅港府亦不得不急急補飛。食衞局局長陳肇始尋日去咗患者居住嘅彩雲邨做滅鼠騷，被問到山竹襲港搞到塌樹遍地、垃圾圍城，食環署係咪顧此失彼，唔得閒滅鼠，阿姐佢就不慌不忙咁搬出「山竹將老鼠竇吹咗出嚟」做藉口，簡直九唔搭八，乜嘢叫欲卸之責，何患無詞，大家見識到啦。

係人都知，港府搞衞生搞到一鑊泡，本地登革熱疫情爆完冇耐，又輪到全球首例老鼠傳人戊型肝炎，計埋之前嘅全球首例人類禽流感、沙士全球死亡人數最多等唔光彩紀錄，香港再添一項全球第一，認真羞家。掌管衞生事務嘅高官唔係知恥近乎勇，仲將隻鑊卸落風災度，有冇再離譜啲吖。

真係睇到都眼冤，香港鼠患遍布港九新界，無論係大小公共屋邨、近日通車嘅高鐵西九龍站，抑或係啟德郵輪碼頭、香港公園同埋消防訓練學院，統統搵到老鼠蹤影，都唔使講橫街後巷、食肆廚房呢啲重災區。好話唔好聽，成個香港早就變咗老鼠樂園，唔通又賴山竹作怪咩？

一個地方多老鼠，一定係懶貓唔做嘢。香港近年衞生黑點愈來愈多，就係負責全港衞生工作嘅食環署偷懶惹嘅禍。淨係睇彩雲邨，邨內垃圾站經常有老鼠聯群結隊出沒，但係食環署公布該區嘅鼠患指數竟然只得百分之一，低得出奇，唔怪得被人質疑重施故技，用番誘蚊產卵器數據造假嗰招嚟呃市民啦。仲有呀，房署同領展一樣唔好得幾多，屋邨清潔工作經常互相卸責、互相扯皮，老鼠有乜辦法唔係老是常出現吖。

嗱，陳局長話喎，食環署會繼續喺「食、住、行」三方面杜鼠，亦會加強全港十八區及各小區嘅滅鼠工作，同時唔介意投放更多資源滅鼠。聽住先喇，當年沙士死得人多，港府夠發起全港清潔運動喇，高官仲攞起掃帚掃地，結果係點，大家心照。

都係港大袁國勇教授鬧得啱，當年港府連後巷都打掃得乾乾淨淨，皆因個個驚死，依家好了傷疤忘了痛，唔止打回原形，老鼠仲大過隻貓，奇難雜症唔長爆長有至奇。咪話功夫茶唔提醒，官老爺仲唔痛定思痛，認真搞好衞生，萬一戊肝大爆發，甚至連沙士都捲土重來，香港玩完都似。