上水「倉狗」流落街頭變水貨客公敵 遭掟篋重擊飛腳狂踢

《晴報》，2018/10/12

上水街頭處處擠滿水貨客，人車爭路隨處可見，但原來經常發生人狗爭路的衝突，一隻「倉狗」雪雪早前因貨倉搬遷而流落街頭，幸獲好心清潔姐姐照顧，餵食麵包及飯餸，雪雪亦知恩圖報，每日跟隨左右陪伴掃街，卻因此引起在街邊「上貨」的水貨客不滿，有人反嫌雪雪骯髒阻路，竟飛篋重擊、出腳狂踢驅趕，有街坊不忍再見雪雪受虐，在網上求救。

「毛孩守護者」創辦人陸家捷（Kent）表示，4歲狗女雪雪原本是一隻「倉狗」，由上水彩暉街（IEKA貨倉附近）的倉務員飼養，惟早前貨倉搬遷，雪雪便遭遺棄，「嗰時連埋雪雪總共有4隻，義工間中都會幫手餵，但貨倉執咗無帶走狗狗，佢哋從此無人理，其餘3隻不知所蹤，得返雪雪喺附近街頭流浪。」

近月雪雪經常在龍琛路一帶流連，幸運地遇上一位在垃圾站工作的清潔女工，「嗰位阿姐好好心，雖然自己都好窮，但每日都帶啲餸頭餸尾餵雪雪，有時仲會買麵包。」Kent續指，雪雪都很有靈性，「阿姐周圍掃街，佢每日都會跟住去，陪喺旁邊。」

然而，龍琛路一帶滿佈水貨店及藥房，街上擠滿水貨客開篋「上貨」，遍地行李篋令原來狹窄的街道難以通過，爭路情況時有發生。有街坊近日發現雪雪經常遭水貨客虐待，拍下照片放上網指：「狗狗（雪雪）好驚人，身處的地方只有水貨藥房同馬路，好多水貨客經過都會撞佢同踢佢，連企既地方都冇……」希望有好心人地可以拯救雪雪。

Kent透露，先後接獲多次好心人士通知，擔心雪雪受傷，「上水水貨店多到咁，唔好話狗，人都無路行，何況狗！」他引述目擊人士稱，水貨客每見雪雪靠近便會驅趕，「佢哋唔敢用手趕，就會成個篋大大力車埋去，好狼好惡，完全唔會留手！」

毛守義工曾多次出動卻無所獲，至近日終於成功捉到雪雪，已將牠送往獸醫診所檢查，證實患有牛蜱熱及皮膚病，有營養不良情況，「最初得知佢經常畀人踢畀人撞，都擔心雪雪會唔會有內傷，但暫時見情況未算好差。」Kent透露，現時已有暫託家庭願意暫時照顧雪雪，稍後會再為牠尋找合適的領養家庭。

對於「倉狗」流落街頭，Kent坦言近年情況愈來愈多，指由於百物騰貴，租金不斷上升，新界不少倉庫被迫「大搬細」，最終狗狗便被遺棄，「流落街頭結局通常都好慘，一係餓死，一係畀其他狗咬死。」Kent希望主人即使未能帶倉狗同行，亦應盡力為牠們尋找棲身之所。