東平洲發現喺本港水域罕有出現嘅棱皮龜，可惜已經死咗，屍身腐爛而且露出骸骨。香港可持續多樣性保育協會聯同香港珊瑚礁普查基金等多個團體嘅義工，星期日喺東平洲沙灘進行珊瑚普查同埋清潔海岸時，喺更樓石附近石灘發現嗰隻棱皮龜屍體。
參與保育工作10幾年嘅香港可持續多樣性保育協會副主席黃兆輝博士，同在場嘅海洋生物學家觀察棱皮龜屍體，估計佢死咗一個月左右，有1.5米至2米長。黃博士話，佢哋好驚訝喺屍體肛門位置見到一束膠繩或魚絲物體，稍為拉扯就會牽動尚未分解嘅殘餘組織，估計棱皮龜生前食咗大量消化唔到嘅海洋垃圾，屙又屙唔出，可以想像隻龜幾痛苦！佢哋之後通知咗漁護署跟進。
易危物種 身長可逾兩米
國際自然保護聯盟（IUCN）嘅瀕危物種紅色名錄，棱皮龜屬易危物種，佢又叫皮革海龜（Dermochelys coriacea），係龜鱉目中嘅巨無霸，體長可超過兩米，體重可達800至900公斤。根據資料，佢哋同其他海龜最大分別係佢哋嘅殼同頭冇角質板，所以佢哋冇堅硬嘅甲殼，龜甲係由革質皮膚同有較多脂肪嘅肉組成，身上散佈白色或米白色嘅斑點，主要食糧係水母。
膠袋似水母 易誤當糧食
膠袋似水母 易誤當糧食
黃博士解釋，水入面嘅塑膠同水母好似，所以棱皮龜食咗好多類似水母嘅膠袋等物質。棱皮龜好叻深潛，喺水深到1,000米嘅海底同較凍嘅海域活動。香港唔係棱皮龜主要繁殖地，但係某啲群族嘅遷徙路線可能會經過本港水域。漁護署話嗰隻係成年雌性棱皮龜屍體，因為屍體嚴重腐爛，好難確定死因，但會保留部份骨骼同組織做研究。過往冇棱皮龜喺本港生蛋嘅紀錄。
文章
