夜鷺綁嘴掛樹 疑遭吊死

《蘋果日報》，2018/10/3

青衣公園係出名「打雀」嘅地方，有唔少攝影發燒友帶晒長鏡去拍攝唔同種類嘅雀鳥形態。街坊吳小姐幾乎每日都會行過青衣公園，前日下晝3點左右，佢喺青衣公園5號閘附近，見到有兩個小朋友望住棵大樹，佢又好奇跟住望，點知見到有一隻雀鳥個嘴好似被勾喺樹上嘅一條線上面，仲打咗個圈㖭。吳小姐觀察咗大約10分鐘，見隻雀郁都唔郁，相信經已死咗。

吳小姐唔知勾喺樹上面嘅係乜線，亦都唔明點解會綁咗喺樹上，佢覺得如果隻雀真係俾啲線纏死，實在幾殘忍，亦都擔心呢啲陷阱會繼續對雀鳥構成危險。小記之後去過青衣公園視察，已經唔見嗰隻雀鳥，究竟隻雀生死如何，康文署就話佢哋跟進緊。

生態教育及資源中心保育經理陳錦偉從吳小姐嘅相片中認出嗰隻雀鳥係夜鷺。夜鷺羽毛呈灰色，背部同頭頂係黑色，粗喙頸短。夜鷺係夜行性鷺鳥，喺巿區常見，亦係本港5種數量最多嘅鷺鳥之一。