譚文豪玩實測 帶假狗搭港鐵

《東方日報》，2018/10/22

隨住愈來愈多人鍾意養寵物，不時會喺公共交通工具上見到有貓狗「偷渡」。立法會議員譚文豪（Jeremy）早排就喺港鐵玩實測，睇吓帶寵物搭車係咪真係會影響其他乘客，但喺香港寵物搭車好似唔得㗎喎？睇真啲原來佢裝「假狗」！放隻毛公仔入袋就當係，唔怪得冇人反感喇。

舊年倡搞動物車廂

話說Jeremy舊年已經叫港鐵學台灣搞動物車廂，點知港鐵話要研究，到依家都未見影。所以佢趁暑假飛去台灣，帶老友嘅狗狗「呆呆」搭捷運同巴士。台灣嘅動物友善政策比香港多，寵物可以去餐廳陪主人食飯，Jeremy都專登同「呆呆」去食雪糕。不過搭巴士時，Jeremy就口快快叫錯「包包」，搞到「呆呆」畀唔到反應囉。

返到嚟香港，Jeremy帶毛公仔「旺財」去試搭港鐵，開頭用一架寵物車將「旺財」放入去，引嚟旁人奇異嘅目光，最後佢換咗另一款較密實嘅寵物袋，整個過程中冇市民表現厭惡，Jeremy得到嘅結論就係大家都接受到。不過話時話，都可能係市民早已睇穿佢「裝假狗」，所以冇反應啫！