阿叔黃金右腳抽射 老鼠飛上一樓撻落地

《蘋果日報》，2018/10/25

用棍扑、大腳踩都唔得，畀隻老鼠跑咗去。讀者Kenny噚日朝早大約11點，經過慈雲山慈康邨康添樓對開，見到一男一女清潔工喺度捉老鼠。有個阿叔行過見佢哋兩個人都搞唔掂就話：「唉，喺倔頭路你都拍唔到佢！」跟住就忍唔住出手。

個阿叔輕輕鬆鬆行埋去，隻老鼠咁啱向佢個方向走，timing啱啱好，佢好似當隻老鼠係個波咁，使出黃金右腳大力抽射，兩個清潔工即刻彎低腰閃避，隻老鼠俾人踢到飛起，幾乎去到1樓咁高再跌返落地。

阿姐扑多棍補飛

Kenny都讚阿叔「佛山無影腳，寶刀未老！」阿叔踢中目標哈哈笑，兩個清潔工都話佢犀利，清潔姐姐第一時間走埋去睇吓隻老鼠，阿叔就氣定神閒行埋去，佢邊行邊話：「暈咗啦！」清潔姐姐亦都好開心確認隻老鼠暈咗，之後仲加多棍補飛。

黃大仙區議會食物環境衞生事務委員會主席、慈雲東區議員何漢文話黃大仙區議會一路以嚟都關注鼠患問題，喺未發生彩雲邨居民感染全球第一宗由老鼠傳人嘅戊型肝炎之前，每次區議會嘅食環會議都幾乎有講鼠患問題。何漢文話根據每個議員提供嘅個案數字嚟睇，感覺上係遠超過食環署公佈嘅鼠患指數。

何漢文指出，慈雲山慈民邨同慈康邨一向都有老鼠出沒，屋邨入面嘅花槽經常有鼠洞，何漢文形容「封完又有、封完又有」；「山竹」風災之後，斜坡冧樹留低好多樹窿，唔知係咪咁令老鼠多咗，區議會曾經要求食環署加強滅鼠工作，但何漢文慨嘆，問題惡化咗就冇，但老鼠減少咗我哋又唔係好覺！