2018年7月3日星期二

係愛呀!野豬闖地盤  馬騮大食P宴客

《蘋果日報》,2018/7/3

成日都聽人講「懶過隻豬」、「曳過隻馬騮」,兩樣完全唔同性格嘅動物,原來又可以和平共處,仲一齊開餐,呢個咁有愛嘅場面,畀讀者黎小姐拍低咗,仲大讚兩隻都「好可愛呀!」

懶理相機埋頭喪食

熱愛行山嘅黎小姐,上周六(上月30號)黃昏6點幾,行到金山郊野公園準備搭車離開,喺九龍水塘入口位置,見到兩隻小野豬,「大約一呎多長,肥嘟嘟,身上仲有西瓜紋,好特別,好得意!」當時,兩隻乳豬仔埋頭食緊遊人留低嘅薯片,身旁仲有隻馬騮仔,3隻一齊開P,食得好開心咁款,當黎小姐打算行埋啲影相,其中一隻野豬仔比較怕醜即刻走咗,但另一隻竟然毫無反應,亦無抬頭望人繼續喪食,似乎餓咗好耐咁喎。

黎小姐話,野豬仔食食吓,對身旁馬騮仔手上嘅食物產生興趣,野豬仔伸個頭埋去,嗱!想食埋人哋手上嗰份點都講唔通,眼明手快嘅馬騮仔,即刻一手拍落對方個頭度,「佢哋冇打交,但馬騮仔唔肯分畀佢食。」黎小姐話,雖然經常行山,但係見到兩隻野豬一齊出現,仲要同馬騮爭食,都係第一次,「如果佢(小野豬)遇到成年馬騮,可能會打佢。」黎小姐覺得,乳豬仔因為仲細,所以唔知驚。喺佢哋開P嗰陣,黎小姐留意到有隻成年野豬,一直企喺馬路嘅另一邊,似乎係豬媽媽等緊隻為食豬仔。

小記睇返資料,發現喺金山郊野公園,間中都會因為豬猴爭食而引發混戰,因為經常有人上山餵飼野豬同馬騮,令到佢哋唔怕人,更加走到民居,漁護署提醒市民,唔好餵飼任何野生動物。