野豬家族殺入獅子山

《東方日報》，2018/7/30

野豬芳蹤處處，《蘋果》噚日報道本來是馬騮盤踞嘅金山郊野公園，現時已經俾野豬群霸佔，估計因有人餵飼野豬有關。吳小姐本月21號同朋友行山都見到野豬，佢哋嗰日由黃大仙沙田坳道起步，經獅子山郊野公園諗住行去沙田。

大豬唔理人　豬仔驚青

下晝4點幾，佢哋行到紅梅谷自然教育徑，就快落到大圍，當佢哋沿石屎梯級行落去燒烤場嗰陣，喺吳小姐前面3至4級位置，突然有隻野豬媽媽帶住一隻野豬仔喺山邊行出嚟搵食，吳小姐話初時都有啲驚，見野豬好似唔係好理人，佢又唔敢再行近，於是停低影相，過咗大約5分鐘，野豬聽到人講嘢聲先慌失失咁跑番入叢林。

佢哋繼續落山，接近燒烤場又見到一群6、7隻野豬仔，細隻嘅比較驚青，一聽到有聲就跑走。吳小姐話聽其他行山人士講，估計有人喺度餵野豬，所以越嚟越多野豬走嚟等食。吳小姐都係第一次見到咁大班野豬喺面前行過，佢認為人類同野生動物可以和平共處，不過佢就唔贊成餵野豬嘞，驚會好似馬騮咁唔驚人，見到人拎住膠袋就搶嘢食。