小赤狐險變皮草 又遭網上兜售

《蘋果日報》，2018/7/25

大家仲記唔記得舊年嗰隻小赤狐呢？佢已經喺3月移民咗去新加坡動物園，佢曾被當成狐球，差啲要人道毀滅，但有人似乎冇吸取到教訓，仲係隨便買賣同飼養動物。

賣家開價$3,600

讀者王小姐上星期四（19日）喺facebook群組「香港寵物交易區」，發現有人放咗幾張聲稱係「熊貓狐」嘅相片，相入面嘅狐狸仲係一隻BB，白雪雪、面尖尖咁，耳下位置有兩撮灰毛，貼文嘅其中一張相中嘅狐狸比較細隻，相信係剛出世時影，但就冇講係咪同一隻。王小姐話曾經有網民留言指賣家犯法，要求佢刪除，但賣家就好寸咁叫對方報警。之後王小姐假扮買家查詢，賣家話隻狐狸4個月大，係男仔嚟，開價$3,600，王希望有關方面跟進吓。

嘉道理農場嘅專家話其實呢隻係赤狐，係人工繁殖作皮毛貿易之用。由於狐狸身上可能帶有狂犬病，唔鼓勵市民將佢哋當寵物飼養。漁護署發言人話會跟進調查網上賣赤狐事件。

根據《公眾衞生（動物及禽鳥）條例》及《狂犬病條例》，雖然管有赤狐毋須領牌，但赤狐進口前必須取得許可證，但由於赤狐屬外來品種，具有侵略性，並對公眾衞生和安全構成威脅，更可能會破壞生態系統，漁護署一般不會批准其入口作寵物飼養或販賣。任何人士未獲批准而進口活生動物即屬違法，一經定罪，最高可處罰款五萬元及監禁一年，而有關動物亦會被充公。

另外，根據法例，所有從事動物商業買賣的人士都必須領有由漁護署簽發的「動物售賣商牌照」，違者最高可處罰款十萬元。一般而言，署方不會就未獲准進口的動物簽發售賣商牌照。

另稿:
記者扮買家　想睇「實物」被拒

小記上去有關嘅專頁望過，發現「賣狐狸」帖文已經刪除，於是透過短訊向該名賣家查詢。

「狐狸邊有出世紙㗎」

該名女賣家回覆話，狐狸仲未賣，但已減價至$3,400，仲話可以安排客貨車送貨，送貨時只需要畀錢司機就可以，賣家喺唔會現身，小記要求睇到實物再決定，但佢就話「敏感嘢唔可以出嚟睇」，明顯知道咁做係犯法。

小記扮無知咁問賣家，隻狐狸有冇出世紙，獲回覆「狐狸邊有出世紙㗎」，再話有啲擔心狐狸難養同埋怕有病，女賣家就提醒，狐狸嘅排泄物比貓狗臭，要有心理準備，言談間透露，其實隻狐狸係佢朋友養嘅，「狐狸好難搵到本地繁殖，我估佢都係喺大陸帶返嚟」，仲話隻狐狸已經同屋內嘅狗狗同住咗幾個月，「如果有病都死晒啦」。小記懷疑佢朋友除咗無牌出售動物，仲要非法入口赤狐，已經至少觸犯咗兩條法例。