狗女絕育 愛協狠剪1/3耳仔

《蘋果日報》，2018/7/25

為咗防止流浪狗問題加劇，愛協會為佢哋免費絕育，之後會剪去部份耳角作識別，最近網上流傳一張唐狗女部份左耳被剪去嘅相（圖），有愛護動物人士質疑，愛協剪去嘅面積超過三分之一，做法太過份，引來網民熱議。

愛協︰範圍合乎標準

陳小姐喺前日將一頭唐狗女嘅相貼上facebook群組「唐狗會學習營」，相入面嘅唐狗女，左耳超過三分之一被剪去，同右耳比較明顯短咗截，「你當佢哋係貨倉狗、流浪狗箒，我哋當每一隻都係自己㗎」。陳小姐話，隻唐狗女原本被養喺貨倉，後來遭棄養，唔少人紛紛留言戥狗狗慘，擔心咁樣會影響佢日後被領養嘅機會。

但亦有網民留言撐愛協，強調愛協一直都唔建議剪耳，一般只會為流浪貓狗做絕育時先會強制剪耳，以免日後佢哋再錯誤被捉及無辜「捱多一刀」做多次絕育手術。

愛協發言人回應指，今次係狗狗嘅主人要求剪耳，而剪耳係用作識別動物係咪已經絕育，一般係用喺流浪動物身上，因為佢哋喺街上生活，需要捕捉佢哋，再將佢哋送往診所進行絕育，所以剪耳範圍需要喺有距離嘅情況下，能夠用目測辨認係最理想。一般來講，剪耳範圍以唔多過耳仔三分之一為標準，愛協認為今次狗隻剪耳範圍係合乎標準。愛協強調，剪耳只係去掉耳仔部份外廓，唔會影響隻狗的聽覺同健康。