野豬嬲豬 男女被咬周身傷

《蘋果日報》，2018/7/26

香港好多地方都有野豬，非官方估計有成幾千隻，前日朝早11點幾，香港大學附近巴丙頓道近列堤頓道，就有一隻野豬嚟咬傷一男一女途人，野豬之後逃之夭夭，漁護署接到通知之後都好緊張派人去現場睇吓，但就唔見野豬，即日通知港大提醒師生遠離山邊，出入要同野生動物保持距離。

到噚日朝早6點幾，的士大哥馮先生揸的士經過相距現場大約500米嘅旭龢道垃圾站，見到一隻野豬喺度摷嘢食，但馮先生就唔知道呢隻野豬係唔係嗰隻野豬嘞。

舊年港大附近都曾經有野豬行過馬路，最後警察要出動盾牌用繩圍捕。前日遇襲嘅傷者分別係41歲陳先生同埋39歲周小姐，陳生當時行經過巴丙頓道，俾走出嚟隻野豬咬傷，臉、膝頭同手都有傷；周小姐就頭、胸、手腳受傷，兩個都要去醫院求醫。唔計今次，過去9年都發生過4宗野豬傷人事件，漁護署話噚日再同港大嘅人一齊巡視校園附近一帶，都未見野豬，漁護署話會繼續跟進，嘗試聯絡傷者了解多啲資料。香港野豬關注組幹事黃豪賢都希望慰問兩位傷者。