馬騮開Poolside Party 半山屋苑變水上樂園

《蘋果日報》，2018/7/27

啱啱嘅星期一係大暑，連日天氣熱到飛起，馬騮山一班大大細細嘅馬騮家族都頂唔順，要游水消暑降溫，佢哋都好識嘆，揀咗沙田火炭半山區私人屋苑嘅室外泳池做佢嘅澡堂。洪小姐噚日朝早約7點就見到10幾隻馬騮喺泳池玩，好似水上樂園咁。

醫生︰應消毒才重開給住客

猴王揀中嘅屋苑係豐景花園，有一大一細室外泳池，十幾隻馬騮有啲跳入大池，有幾隻就喺BB池浸水，有啲喺池邊走嚟走去，爬上爬落，洪小姐話已經見怪不怪。

之但係馬騮游完，之後住客又去游，有冇問題㗎？小記問過家庭醫生，醫生都擔心馬騮會帶菌落池，話晒通山走，又摷垃圾搵食，亦有可能喺泳池「解決」，菌種可以好多㗎！

醫生舉例，常見嘅大腸桿菌、腸球菌咁，人類一旦感染到會導致肚屙甚至急性腸胃炎；其他病菌仲有金黃葡萄球菌，會令傷口感染、含膿發炎。醫生建議屋苑要暫停開放泳池，換水同徹底消毒，抽驗水質冇問題先至重開畀住客用，咁會安全啲，最重要梗係阻止馬騮再踏足泳池啦。

豐景花園物管公司職員同小記講，泳池今季開咗個幾月，呢兩日先發現有馬騮闖入，已經吩咐救生員見到馬騮要趕佢哋走，同埋會喺池邊拉網防止馬騮再落水，亦都會進行消毒先畀住客游水。職員仲話，附近屋苑嘅私人泳池，早幾年就已經有馬騮游水嘅情況。

另稿:
巨型捕猴籠生晒草

火炭豐景花園室外泳池成為馬騮嘅後樂園，《蘋果》去睇過，嗰度係依山而建，屋苑對開山邊叢林都有馬騮出現，漁護署仲喺近山頂位置嘅叢林放咗大捕猴籠，但籠入面生晒雜草，又唔見有餌，街坊都話唔覺個籠有捉到馬騮。

不過，豐景居民似乎習慣同馬騮一齊生活，好似趙先生就覺得馬騮問題唔算嚴重，佢都見過有馬騮仔跳落屋苑泳池，認為污染咗池水，管理公司應該要先換水，暫時唔好畀住客落水。

另一住客盧小姐亦都話，上年已聽過屋企人講，喺屋苑泳池見過馬騮，但佢自己就冇親眼見過，亦都唔肯定管理公司有冇封泳池消毒。喺度住咗好多年嘅陳先生同小記講，冇聽過屋苑有馬騮爬入屋，亦都理解啲馬騮通山走，好難話杜絕佢哋走入屋苑嘅。