爬鐵柱 周圍捐 松鼠港鐵愛漫遊

《蘋果日報》，2018/9/27

究竟係香港「鼠患」真係咁嚴重，定又係早前颱風「山竹」吹冧晒啲樹，帶嚟嘅後遺症？大家唔使驚，因為今次講緊嘅唔係老鼠，而係松鼠。話說周日有市民喺港鐵站裏面，見到有隻松鼠出沒，隻松鼠仲同其他乘客一齊搭車，不過佢就坐唔定喺車廂內亂咁走，嚇到其他人彈起仲咿嘩鬼叫，場面一片混亂。

誤以為老鼠　乘客嚇餐飽

話說嗰日下晝近3點，市民梁先生喺荔景站等緊車，突然見一隻物體，喺往中環方向嘅車頭月台位置，抓住鐵柱不斷向上爬，但爬爬吓捉唔實跌返落地，由短片見到，隻松鼠唔算大隻，條尾同佢個身嘅長度差唔多，身手非常敏捷。

有女乘客喺月台見到有松鼠覺得好出奇，有小朋友就覺得隻松鼠好得意。隻松鼠喺月台苦無出路，咁啱一架列車剛埋站，松鼠即刻搭順風車走，走得快好世界，如果唔係夾住就唔知點算嘞。

另一位讀者翁先生就話佢家姐當時喺車上面，當時列車由長沙灣駛緊去荔枝角站途中，突然發現有隻嘢喺車廂內走嚟走去。當時好多乘客都未睇清楚係乜嚟，有人以為係大老鼠，但見到隻嘢全身毛亂咁走，好多人都嚇餐飽，之後睇清楚先知道原來係隻松鼠嚟。

從翁先生提供嘅短片睇到，當時車廂內唔少乘客爭相走避，好多女乘客仲俾隻松鼠嚇到尖叫。不過睇嚟隻松鼠都好驚，佢可能見到港鐵車廂逼爆晒人，嚇到佢周圍走。翁先生引述佢家姐話喎，「當時好刺激，車廂啲人個個嚇到縮起隻腳，有啲仲嚇到跳起身，好似玩人浪咁！」不過就冇人夠膽捉隻松鼠，結果要交畀港鐵職員處理。

港鐵回應指，當日下晝近3點，接獲乘客報告發現松鼠，車站職員喺長沙灣上車搜查，並無發現，當列車駛至中環總站，職員再登車作徹底檢查，同樣無發現。

另稿:
受保護動物　睇得唔養得

松鼠搭港鐵順風車，好可愛呢！小記畀咗條片嘉道理農場嘅專家，證實佢係赤腹松鼠（Callosciurus erythraeus，圖），但單憑條片就唔可以肯定佢係咪野生，而松鼠大鬧港鐵站同近日打風塌樹有冇關，專家都話難以判斷喎！

根據漁護署嘅紀錄，本港係有野生松鼠嘅，而赤腹松鼠係外來物種，引入後在本土繁殖及建立族群，最後更成為本港嘅野生動物，亦係香港常見嘅品種，佢哋分佈喺大欖、城門同大埔滘等新界地區，港島大潭同薄扶林等亦有佢哋嘅蹤影。

不過，小記亦要提提大家，咪以為松鼠咁得意可以帶返屋企養，因為佢哋係受「野生動物保護條例」保護，任何人除按照特別許可證行事外，不得狩獵、故意干擾及管有或出售任何受保護野生動物，一經定罪，最高可被判罰款十萬元及監禁一年。