高鐵老鼠吱吱吱

《蘋果日報》，2018/9/28

高鐵香港段通車以來，無論列車安排同車站嘅設施，都仲有好大改善空間，正當高官叫市民畀啲耐性嘅時候，有讀者發現啟用咗幾日嘅高鐵站，已經火速中港融合，例如：垃圾冇人清、米奇周圍走！

讀者趙先生周二黃昏6點左右，趁假期同女朋友去高鐵站地面層嘅綠化用地拍拖，點知行咗冇耐，就見到現場幾個垃圾桶都塞到爆晒，冇人清理，唔少垃圾更加跌咗落地，就咁睇真係以為返咗大陸，點知好戲在後頭，「我見到個紙盒郁緊，原來隻老鼠咬。」

垃圾冇人清　職員懶懶閒

由趙先生提供嘅短片見到，有位着住制服嘅職員坐咗喺垃圾桶旁邊，但完全冇反應，「有人大叫『有老鼠呀！』職員都好似聽唔到咁。」片入面隻老鼠大大隻，趙生見住佢喺垃圾桶花槽來回咁跑，完全唔驚人，「話晒都係招呼遊客嘅地方，我覺得咁樣好丟架囉！」港鐵回應話，得悉事件後已即時要求承辦商處理，並加強滅鼠工作。