被遺棄動物 許願樹下等愛

《蘋果日報》，2018/3/19

動物都會去林村許願？係㗎，仲喺林村度過愉快周日。經民聯噚日喺大埔林村許願廣場舉行第二屆「動物許願節」，宣揚愛護動物嘅訊息，今年特別之處係設有寵物領養區，鼓勵公眾領養被遺棄嘅動物，為佢哋展開新生活，又增設美食車及「Opera狗狗障礙賽」，現場唔少寵物同主人都玩到不亦樂乎。

呢次活動有多達17個動物慈善團體參與，同場仲提供免費寵物美容服務，亦有動物傳心術師、動物訓練師、動物按摩師及香薰療法等免費服務，兼有攤位遊戲同創意市集。本身都好關注動物權益嘅經民聯青委會副主席林顥伊當然有撐場。

經民聯主席盧偉國致辭時話會繼續舉辦更多活動，促進社會關注動物權益，身為色士風高手嘅佢仲喺廣場露兩手，即席吹奏《月亮代表我的心》娛賓。