野豬渡維港 水陸兩路無敵手

《蘋果日報》，2018/3/15

自從2011年維港渡海泳復辦，每年10月都有幾千人游水過海，何其壯觀。噚日就有泳手疑似提早足足半年試水……咪住先，咁多毛嘅？

有網民前日喺西環碼頭吹風影相之際，發現呢位「野豬界歐鎧淳」悠然游向岸邊，睇嚟好有經驗，完全無視碼頭嘩嘩聲舉機影相拍片嘅遊人。野豬喺堅尼地城海旁搵到個位登陸，一上岸就走嚟走去搵嘢食。警察接報到場攞盾牌包圍，野豬嚇親之下急急腳橫過城西道，去卑路乍灣公園散步，途經車輛都要收慢避開，可憐阿Sir索晒氣，直到夜晚9點野豬先至落網，由漁護署人員運走。

呢隻冇獠牙嘅野豬冇搶嘢食，又冇狂奔撞人，街坊都讚佢乖，不過亦有女士獨具慧眼，大嗌「呢隻黑毛豬嚟㗎」！