2013年4月8日星期一

專業輔導員助主人解除傷痛

《蘋果日報》,2013/4/7

「為咗隻狗使唔使喊得咁緊要?養過另一隻咪得囉!」不是每個人都了解告別寵物、主人心如刀割的感受,出現內疚、自責及抑鬱等情緒其實很正常。

情緒支援服務不足

香港目前只有兩家提供寵物離世哀傷輔導服務的機構,除了「保護遺棄動物協會」,另一家是「動物力量」,創辦人是阿Lok及Gloria夫婦,二人都是社工,曾報讀美國APLB進修課程,為認可寵物離世輔導員。

他們關注動物善別輔導的不足,其實源自朋輩的經歷,「好多朋友、同事、親友都經歷過,好多人會話『使乜傷心得咁誇張?』咁嘅想法,不被親人、友人或者社會認同,實際上又缺乏情緒支援服務」。阿Lok又指,愛錫寵物容易造成「狗癡」、「貓癡」印象,令他人誤解,「寵物死咗而感到傷心,有主人可能會諗『我喺咪有問題?』呢種傷痛其實係正常嘅反應,唔應該去逃避、收埋」。

他聽過很多寵物離世個案,較常見的是在突發情況下不懂處理,「太突然要接受寵物即將離去,如果揀安樂死又覺得係自己直接造成死亡,但係繼續醫又覺得增加或延長佢嘅痛苦」。阿Lok指人的能力有限,不要讓「如果」及無盡回望去箍緊自己。

經輔導後終能放下

曾參加過講座及小姐分享的義工Amon,都經歷過失去愛犬北京狗「哥哥」的傷痛,「最嚴重時會失眠、無胃口,要食藥控制,不停回想同佢一齊嘅畫面,情緒低落咗成個月」。試過一次,她回家時站在街角路口,卻想起「哥哥」已不在,忍不住大哭及不想回家。

直至找到「動物力量」輔導,她找到相同遭遇的朋友,開始改變自己的想法,「我知道哥哥已經離開,雖然唔捨得,但我可以選擇將愛延續」。後來她領養了約瑟爹利「拖肥」及貴婦犬「丹丹」,承傳了Amon的愛,生活得快快樂樂!

阿Lok現時在香港大學當研究寵物善別輔導工作,正尋找更多寵物逝世人士的個案,有興趣者可到網頁留下聯絡。

動物力量Facebook網頁:http://www.facebook.com/animalpower.hk

另稿:
愛犬離世 大男人落淚  靈前勤探望 奉食物寄情

「牠可能是我生命的部份,但我是牠生活的全部。」寵物陪伴主人身邊,可能一起睡、一起造夢,但寵物壽命一般比人短暫,死亡始終躲不過。面對視如親人的寶貝逝世,主人傷痛心如刀割。這個清明,他們回到寶貝的靈前探望,回憶起生前點滴,淚中有笑,盼望寶貝可以說聲:「一切安好。」

邊境牧羊犬Champion過身時僅8歲,牠雖是名種犬卻自幼遭遺棄,經歷了三位主人,「寵物店老闆話佢前腳唔靚,出唔到比賽,畀咗我朋友;一次暫託到我屋企度假,之後覺得佢好乖就收養咗佢」。

為治愛犬擲十多萬

阿杰回憶起Champion生前種種,點滴在心頭,「佢係11年7月10日過身,因為骨枯發現骨癌」。有人願意買車買名錶等心頭好,阿杰卻願意為愛犬一擲千金,「手術費、藥費加埋用咗十幾萬」。但此情無價,他無怨無悔。

事隔兩年,阿杰娓娓道來Champion的故事,仍難掩哀痛,「初頭佢走咗,另一隻狗都會搵細佬,好唔開心」。他家裏尚有一頭11歲的雪橇犬,現已有面對另一位寶貝離開的心理準備,「寵物從來係我揀佢哋,佢無得揀我哋(主人)」。

清明節,他認為不太重要,「有心嘅唔使清明都會嚟探佢,有冇時間其實睇你自己」。他每隔一、兩星期便會探望Champion一次,每月都把自製的脫水雞片更換放在靈位。寶貝離去,也令他暫時放下再養其他狗的念頭,「我知道一切都係自己睇唔睇得開」。

回想Bobby突然全身抽搐非常痛苦,令主人Priscilla手足無措,「咁耐以嚟都未見過佢咁,之後驗出係Cancer(癌症)。最後嘅日子Bobby食唔到嘢,胸腔積水要成日抽,仲會失禁」。

由不接受變成寶貝

3個月大跟她回家的小不點Bobby,是一頭曲卡狗,14歲高齡的牠於去年5月24日不敵癌魔病逝,牠的離去令一家人傷心不已。Priscilla指,Bobby最初不被家人接受,後來卻成為父母的心肝寶貝,「我自小就好想養狗,喺我大學畢業嗰年終於先斬後奏帶咗Bobby返屋企,父母初初唔接受,到後嚟慢慢培養出感情,仲當佢係仔女咁」。

媽媽唐太回想起Bobby生前最愛的食物,「佢最鍾意食橙、蘋果,仲有瓜子」。唐媽媽熟悉Bobby胃口,前些日子過農曆新年,她細心地將瓜子逐粒逐粒剝穀,放入紅封包裏頭,再擺放在靈位希望讓牠吃一口。「以前佢都好鍾意食瓜子,佢細個時成日跳上跳落,但都好乖好易湊」。

有說動物會治癒心靈,唐媽媽與唐爸爸亦慢慢愛上Bobby,Priscilla指父親不易落淚,「但Bobby過身時都有為佢喊過」。人狗情深,一家人不只節日才探望Bobby,「我哋住得近,隔個星期就嚟探佢」。

唐媽媽回想Bobby離開後的日子,「間中好似聽到佢辛苦嘅叫喊聲,佢好似仲好近我咁」。定過頭來,彷彿又很遠,Bobby已離開了。

另稿:
送別寶貝前先按摩遺體

Peggy從前飼養一頭金毛犬Coco,在牠11歲時,已做好準備四出尋找寵物善終公司,「睇咗八間,但部份環境好惡劣,我當時已對Coco講唔會畀佢咁走」。

2008年適逢金融海嘯,本身任金融界的Peggy終騰出時間,把心一橫開辦香港寵物紀念館,身兼兩職的她坦言感覺十分不同,「係兩個世界,但始終呢度做嘢滿足感大啲。」主人送別寶貝,說出一聲感激,都是鼓勵。

大學及碩士修讀心理及輔導學,Peggy將知識活學活用,「有個女仔冇乜朋友,佢養嘅金毛犬過身,但佢媽媽唔明白,只講咗句『丟咗佢就算啦!』,令到個女仔好傷心,覺得親人都唔明白自己」。

為主人留下美好印象

她指遇有心結的客人,很多時都不懂讓自己「放低」,「生前對佢充滿愛,主人都要明白let go,令自己重過新生」。清明、重陽是拜祭先人的節日,是否很多主人也對過身的寵物上心?「都有好多主人趁拜山,順便嚟探下佢哋,農曆新年又會多啲,亦會擺低封利是」。

開業兩年多,Peggy的客人多為狗貓主人,亦有魚、龜、鸚鵡及爬蟲類等。為客人送暖,除了配合宗教儀式,還有更細心步驟,「動物屍體冷藏後會硬崩崩,一定要用手按摩令佢關節變柔軟」。軟綿綿的安詳感覺就像睡覺一樣,叫主人留下最後一刻最美好印象。

香港寵物紀念館網頁:http://www.petmemorial.com.hk