Ming Pao Daily News A09 港聞 |426 Character(s) |2022-05-23
鴨脷洲海怡廣場一間寵物cafe 早前火燭，消防員入火場營救一狗三貓，片段傳出後喺網上廣傳，好多人見到消防員拍拍貓仔、狗仔個頭安撫佢哋一幕，讚消防員愛心爆棚。消防處噚日喺facebook回應事件，話「生命無分輕重」，無論係人定動物，佢哋都一視同仁，履行救災扶危嘅使命。
事件中好彩無人同動物受傷。寵物店負責人事後仲帶埋被救出火場、等待領養嘅狗女 Betty，去鴨脷洲消防局「探班」及多謝消防員。寵物cafe事件見報後，其中兩隻貓獲有心人領養，消防處話，衷心祝福所有「毛孩」都可以搵到愛錫佢哋嘅主人，有一個幸福快樂嘅家。
另一條流傳影片，係消防員拯救匿埋喺雨水渠入面嘅一家三口流浪貓，最後救出兩隻幼貓，但大貓就跑走咗。
唔少網民喺消防處個post下面留言大讚，話消防處係超級優秀嘅紀律部門；有網民講自身經驗，話試過搵消防員幫手救貓，「佢哋真係好似救人一樣咁盡力，珍惜每一條生命」。
文章
