Headline Daily P06 港聞 |324 Character(s) |2024-11-30
黃大仙屋苑翠竹花園坐落獅子山郊野公園旁邊，早幾日有居民影到，一群馬騮仔喺屋苑附近建築物嘅天台上嬉戲追逐，跳跳扎扎，又有街坊直擊到一隻大野豬大搖大擺穿過花槽，喺行人路行走嘅畫面，屋苑變成動物園咁，有網民大嗌「驚驚」。
有街坊將短片放到網上群組，見到一群馬騮喺草地天台上互相追趕，跑跑跳跳，如入無人之境。有街坊關心呢個天台究竟喺邊，樓主就話「位於10座旁」。
唔止咁，另一位街坊仲拍到一隻大野豬喺屋苑休憩處出沒，大搖大擺穿過花槽，走過一排凳邊，之後沿住行人路前行，仲嚇到一隻雀仔走夾唔唞。片段中有一位女街坊似乎無發現野豬，仍然施施然喺對面馬路行過。有網民就留言話「好驚呀」，仲提醒街坊嗰野豬好似曾經喺屋苑停車場出沒。
文章
