《明報》，2021/6/23
近年本港多處都有野豬出沒，早前更有野豬走入港鐵車廂。漁護署噚日向立法會提交文件講解實施野豬管理計劃嘅進展，署方喺2017年底起，嘗試以捕捉及避孕／搬遷計劃，處理野豬喺市區造成嘅滋擾問題。漁護署話，計劃2019/20年度起恆常化，至今年3月一共捕獲逾800隻野豬，當中350隻接受咗避孕疫苗及絕育手術；又將逾610隻野豬搬到遠離民居嘅偏遠郊野。
料郊野約有1800至3300隻
漁護署話，根據運作經驗，本港野豬主要常見於南區、中西區、西貢區同大埔區；署方2019年時做全港野豬數目調查嘅前期研究，利用紅外線自動攝影機及統計分析，初步推算全港郊野地區約有1800至3300隻野豬。
署方續稱，研究顯示，近年野豬滋擾個案上升主要同有人餵飼、不當處理戶外垃圾有關，政府相關部門除會清理食物殘渣、加強喺黑點宣傳外，亦改善垃圾收集設施嘅設計，以增加野生動物喺有關設施覓食嘅難度，新設計嘅垃圾桶已喺全港70幾個地點實地測試。
文章
