Ming Pao Daily News A10 港聞 |416 Character(s) |2024-01-18
舊年喺八鄉蓮花地發現嘅一條雌性鱷魚，正式加入海洋公園擔任動物保育大使，園方搞咗個命名活動，希望為呢名新成員公開徵求一個有意義同讓人印象深刻嘅名，市民即日起至本月31 日可提交心水名字，再經公眾投票為鱷魚女選出最佳名字。唔少網民已急不及待喺海洋公園facebook
獻名，有人提議「繽紛鱷」、「林建x」、「鱷飛」，甚至有人講笑提議叫「由治及興」。
鱷魚女舊年由漁護署交畀海洋公園照顧，佢身長約1.9米、體重約35 公斤，年約4歲，園方話佢一直喺後勤設施，由獸醫及專業護理團隊照料，狀態良好。園方近日已攞到漁護署發出嘅管有許可證。
海園：勝出者獲餐飲券會籍
海洋公園話，香港無原生鱷魚，今次命名活動別具意義，希望藉呢個名提醒公眾，外來物種可能會危害本地生態。至於建議名字被採用嘅勝出者，將獲得總值2000 元嘅海洋公園餐飲券，同埋海洋公園全年成人會籍等獎品。
文章
