勇破虐龜案 四警領導才能獲表揚

《蘋果日報》，2018/5/17

雖然好多網民成日話，警察都有出糧，所以捉賊係職責所在，但始終面對賊人，真係有一定危險，如果成功除暴安良表現優秀嘅差人，警隊內部都好應該對英勇警員作表揚嘅，但究竟要幾英勇先有得表揚？原來，又似乎唔係好難喎！

咪以為八方口氣大，此說事出必有因。八方近日睇到一份警隊內部表揚警員嘅通告，當中表揚四名警員喺一單殘酷對待動物案中，成功拘捕一名虐待10隻龜嘅犯人，讚揚負責警員調查同破案期間，有高度領導才能、專業能力同盡忠職守，而犯人最後亦被定罪及判監3個月。
原來差人要獲警隊表揚，唔一定要破大案捉悍匪，破虐龜案都可以獲上頭表揚有獎拎㗎！