鬆獅危掛 籮大卡窗救一命

《蘋果日報》，2018/5/28

「喂！有咩慢慢講，你入返嚟先！」上環有人企跳，啊！係有狗企跳先啱！呢隻Chow Chow（鬆獅犬）因咩事睇唔開呀？講出嚟聽吓！

原來噚日上晝11點幾，呢隻住喺皇后大道中中源中心5樓嘅Chow Chow哥，趁主人唔喺屋企周圍跳，仲伸個頭出窗，點知因為太過肥，想縮返入屋嗰陣，竟然卡住咗，好彩有動物義工發現報警。

由動物義工提供嘅片段可以見到，Chow Chow哥吊喺外牆，前腳不停爬吓爬吓，睇見都覺牙煙。Chow Chow哥嚇到係咁吠，當時烈日當空，熱到佢伸晒脷，真係陰公豬！多得佢個肥美屁股頂一頂，先冇跌落街咋。

由消防救回　現中暑症狀

消防趕到準備破門入屋時，咁啱遇着主人返嚟，消防成功救狗狗入屋，真係險過剃頭，Chow Chow嚇到成身震晒，仲有疑似中暑症狀，但好彩冇受傷，主人陪同送愛協獸醫診所治療。警方懷疑主人離家時窗戶冇關上，而隻成年雄性Chow Chow懷疑貪玩跳出窗外，好彩後腳勾住窗框，先冇跌落街。