郭秀雲哀悼豹貓BB

《太陽報》，2013/8/13

日前本報獨家報道喺沙螺洞發現豹貓BB，可惜獲救後死去。鋼鐵大王後人龐傑嘅太太郭秀雲亦有飼養豹貓，對豹貓BB死咗表示可惜，佢坦言睇到發現豹貓嘅報道後已主動聯絡愛護動物協會，希望可提供協助，又話：「我有豐富嘅養豹貓經驗，我諗住問吓佢哋需唔需要幫手，我可以負責飼養，點之佢哋話隻貓已經死咗。」

佢話當巿民發現初生豹貓後唔應該第一時間報警，尤其係喺附近見到有豹貓媽媽嘅爪印，佢解釋：「豹貓係野生動物，佢哋怕畀人騷擾，所以成日搬竇，但豹貓媽媽每次只可以搬到一隻BB，所以大家見到有初生豹貓時，可能豹貓媽媽去咗搬其他貓仔，之後會再返嚟接番隻貓，巿民應該每隔一兩個鐘頭再返現場睇吓，如果真係隔咗好耐隻貓仲喺度，咁可能豹貓媽媽真係出咗事，咁樣先報警都未遲。」另外，佢又質疑為何警方會將初生豹貓交畀冇照顧豹貓經驗嘅愛護動物協會義工照顧，做法並唔恰當。