2019年3月30日星期六

城大獸醫診所 貓狗不碰面

《明報》,2019/3/29

當愛好寧靜嘅貓,遇上蹦蹦跳嘅狗,兩者或有摩擦。城市大學獸醫診所將由旺角太平道遷至深水埗,並於下星期三(3號)啟用,暫命名「城大動物醫療中心」,預期每日診症數目可倍增至400。中心一改貓狗共用等候診症區嘅做法,分別設貓同狗嘅專區,希望安撫「病人」緊張情緒,同時引入號稱全港獨有嘅64切面電腦斷層掃描儀,提升掃描速度同準確度。

中心約3.3萬平方呎,較太平道大近1倍,中心獸醫總監Jonathan Speelman話,已增聘8至9名獸醫,令獸醫人數增至37,料每日診症數目可由200隻動物增至近400隻。Jonathan話,除貓狗嘅普通科同皮膚科等8個專科,最快今個夏季開設腫瘤專科,亦會於6至12個月內設治療蜥蜴等珍奇異獸嘅病房。

中心斥資800萬元引入64切面電腦斷層掃描儀,3分鐘能掃描64張嘅動物斷層圖像,了解動物體內腫瘤大小等資料,相較以往16切面嘅掃描速度快約12分鐘,亦能睇到以往開刀先睇到嘅細節。修讀城大獸醫課程學生日後有機會到中心實習,對於有指學生實習有違商業及零售嘅土地用途,Jonathan解釋,教學會喺城大校園進行,實習學生主要係觀察診症情况。