流浪牛闖超市開餐 黃文漢呻擾民

《東方日報》，2019/2/11

社會早就關注野豬、野猴滋擾問題，但流浪牛嘅問題近期亦受到熱議，事關早前有牛隻闖入梅窩嘅超級市場開大餐。卓妮尋日喺沙田馬場見到梅窩鄉事委員會主席黃文漢，佢話該超市前晚差啲事件重演，好彩今次反應快立刻落閘，睇嚟呢群牛食過翻尋味喎！

黃文漢話，多年來已要求漁護署跟進流浪牛問題，因為擾民又帶來衞生問題，亦會破壞農作物。佢話黃牛多數純品啲，但水牛唔同，連眼光都會仇視人，以前就發生過水牛撞傷人，有一次佢想阻止水牛入村時，隻牛更迎面衝向佢度添，聽落好驚險。

沈豪傑一見野豬掉頭走

西貢北鄉事委員會主席李耀斌、上水鄉事委員會主席侯志強、元朗區議會主席沈豪傑、香港會計師公會前會長趙麗娟等人都有入馬場。李耀斌就話年輕時要看牛，負責趕牛上山食草，但如果畀佢見到超市有牛都會無符，因為啲牛未受過訓練。佢更講到，冬天經常見到牛隻瞓喺馬路中心，因為石屎散熱慢而較暖，所以對駕駛人士構成威脅。相信趙麗娟都好有同感，事關佢話喺外國夜晚揸車時，經常有不明物體閃出而要急煞，估計同野生動物衝出馬路有關喇。

侯志強就見過野豬衝入村民屋企搞破壞，一雙獠牙更令鄰居隻狗受重傷添。佢認為背脊向天人所食，食咗流浪牛同野豬有助平衡生態，更分享話野豬肉較少脂肪，只要燜得耐就夠香，比家豬仲好食喎。至於沈豪傑就話，喺鄉郊行山同拜山都會見到野豬，而野豬生育後特別惡，所以為安全起見，佢一見野豬就會掉頭走。