2018年6月21日星期四

屋苑捉流浪貓 水糧放籠

《蘋果日報》,2018/6/20

漁護署借捕貓籠畀私人屋苑捉流浪貓,貓籠冇糧冇水兼上鎖,有愛心巿民早前見到貓咪「被困」欲救無從,質疑有人虐畜,於是喺禮拜日(17日)報警。

貓咪暫由愛協照顧

聲稱因滋擾居民,要捉流浪貓嘅係屯門黃金海岸一個私人屋苑,原來喺巿民報警前一日(16日)已經將隻貓交畀漁護署,警方同愛協去咗新界北動物管理中心調查,好彩貓咪睇落仲好健康,之後交由愛協暫時照顧。

近日喺fb熱傳幾張貓咪被困嘅相,一隻貓咪被困喺一個編號「3」嘅捕貓籠入面,籠嘅兩邊都上咗鎖,籠入面嘅食物膠兜係「吉」嘅,籠外面就有零星貓糧同一兜水,但叫隻貓點飲點食呢?

漁護署發言人話,屋苑捉到嗰隻貓已經成年,係雌性短毛貓,初步觀察健康正常。發言人強調,一般會向借用捕貓籠嘅人講明使用細則,要求佢哋喺籠入面攞放糧水等等,若被擒獲嘅動物喺籠入面承受不必要嘅痛苦,借用人有機會觸犯香港條例第169章《防止殘酷對待動物條例》而被檢控,署方會跟進調查今次事件。