2019年4月13日星期六

動物醫療中心開幕切燒豬惹議 城大急補鑊

《東方日報》,2019/4/12

香港城市大學銳意推動動物醫學課程及獸醫服務,轄下動物醫療中心喺三月廿七日舉行開幕禮時,進行咗傳統切燒豬儀式,城大仲上載咗校長郭位同城大動物醫療有限公司董事會主席劉鳴煒一齊切燒豬嘅相,呢張相隨即惹起網民非議,城大尋日急忙補鑊,指考慮到環保意識及同人士嘅感受,城大將繼去除魚翅宴後,要求大學各部門喺慶祝活動中,考慮取消切燒豬同其他不合時宜嘅儀式。

被指「未醫動物先犧牲兩豬」

大批網民連日來批評城大切燒豬行為諷刺,有違救助動物精神,戲謔「係咪示範緊解剖」、「未醫動物先犧牲兩隻豬」。城大尋日解釋事件,指之前大學高層對喺慶典上呈現燒豬,本來都有一啲意見,而開幕禮籌備小組基於切燒豬係一個香港新樓落成時嘅傳統慶祝習俗,所以開幕當日隨香港習俗作出切燒豬安排,有祝福之意。

城大重申,成立賽馬會動物醫學及生命科學院,除咗照顧寵物福祉之外,更關心公共衞生同食品安全。之不過,經過今次事件後,城大應該好好反思,否則隨時再搞出「關公災難」。