體育館白蟻橫行 康文署疑醜事密冚

《東方日報》，2019/6/21

耗資逾七億元興建嘅調景嶺體育館啟用四年，當中嘅兒童遊戲室喺月中進行緊急維修工程，有區議員指翻起室內軟墊發現牆邊有個白蟻竇有似半個人咁高，仲見到有白蟻爬行，人員亦喺室內噴殺蟲水，區議員鬧爆康樂及文化事務署管理有問題。話時話，呢件事明顯係康文署監察不足，有乜理由咁遲先發現有白蟻吖，仲有就係只係貼出通告話有緊急維修，但又唔講明係乜嘢事，擺明係存心隱瞞，有醜事密冚之嫌，署長李美嫦咁樣縱容啲下屬做嘢側側膊，真係抵鬧。